حكايات بنعيشها، بنعيش تفاصيلها و كل حكاية تختلف عن غيرها، في حكايات بنعيش الحزن فيها و حكايات بنعيش الفرح فيها و حكايات الرعب و الخوف عنونها، و كل حكاية تتسم بطابع خاص و ابطال و ناس تدخل و ناس تخرج.

كل واحد فينا بطل قصته و دور مساعد في قصص غيره من الناس و ساعات ظهور خاص و ساعات تانية يا دوب عابر سبيل، مين فينا ما مشفش حكاية أهله و أصحابه و ناس دخل حياتهم صدفة و خرج منها بعد ما دوره كمل، مين فينا مش عايش قصته بكل تفاصيلها.

الفرق بين القصص و حكياتنا الحقيقية اننا بنعيش أدق التفاصيل، بنعيش كل لحظة و ثانية، ساعات الثواني تمر زي النسمة و ساعات بتكون ثواني من الجحيم، القصص بتدينا حبة تفاصيل لكن مش ادق التفاصيل، كل كلمة أتقالت في حياتنا و كل حركة و كل ثانية مرت و كل عمل و كل ضحكة او دمعة هي تفصيل من تفاصيل الحكاية.

مفيش نجاح من غير فشل و لا سعادة من غير حزن و لا حياة من غير امل و لا رغبة من غير الممنوع، كل واحد منا بيعيش تفاصيل قصته و هو بس الي يقدر يحكم فيها لكن انت او انا مين عشان نحكم على حكاية يا دوب سمعنا منها حبة تفاصيل و اتقطع منها حاجات كتير. مين انا و مين أنت عشان نحاكم غيرنا ؟