اهلا بيكم، المرة دي هكتب بالعربي لاني عايزة اقول حاجات كتير و كمان عشان نكلم سوا عن مسلسلات رمضان الي بتتعرض السنة دي…

اولا ازيكوا؟ عاملين ايه؟ وحشتوني و اتمنى يكون وقت و ايامكوا سعيدة! اخبار رمضان ايه؟ من أحب الشهور على قلبي ❤️ ضيف خفيف بيخلص و يمشي بسرعة و يسبنا مشتاقين انه يرجع يزورنا بعد سنة.

مسلسلات السنة دي مش بس مختلفة لكن كمان مختلفة في الصناعة و الأداء و الخلفية من ورا الكاميرا، هنلاقي مسلسلات تفوقت من حيث الجرافيكس و التصوير و الملابس و مسلسلات تفوقت في الكتابة و الأداء التمثيلي و طبعا الاخراج و مسلسلات اختارت صح في انها تكون ١٥ حلقة بس و مسلسلات تانية كان الأنسب انها تكون ١٥ بدل ٣٠ حلقة…

تعالوا سوا معايا في رحلة خفيفة لعالم مسلسلات رمضان الي شوفتها لحد الان و شايفة انها ليها أعلى نسبة مشاهدة!

الحشاشين!

من المسلسلات المفضلة عندي، مسلسل تاريخي بيتكلم عن جماعة حسن الصباح أو الحشاشين او Assassins كما سماهم الفرنسين، اولا، خلينا نكلم عن براعة التصوير و اختيار أماكن التصوير خارج و داخل مصر، الإنتاج صارف و مكلف 😄 اول مرة احس اننا على قدر عالي في الإنتاج و التصوير زينا زي أمريكا و غيرها من الدول المتصدرة في الإنتاج السينمائي و التلفزيوني…

عجبني التصوير من حيث ازاي يبين جوانب الشخصيات، وششهم، تعابير الوجوه، التصوير الليلي، مش هننسى دور الجرافيكس في الحوار ده، و طبعا الممثلين و اختيار الأدوار براعة و خاصة دور كريم عبد العزيز كحسن الصباح، دور نيكولا معوض و اختياره كعمر الخيام، انا واحدة من الناس بعشق الخيام و بحب شعره و فنه و علمه…

كمان الأدوار النسائية و ادوار الأطفال و الشباب الجدد الي قد يكون بسيط جدا لكن رائع في الأداء.

بعيدا عن القصة و انها قصة حقيقية عن اكتر جماعة مرعبة في التاريخ العربي و الإسلامي،  الا انه التفوق في إنتاج مسلسل زي ده بالحجم ده يثبت اننا نقدر نعمل اكتر من كدة و احسن و اننا نشغل المواهب الي موجودة في مصر عشان نطلع نتاج مش اقل و يمكن احسن من برا.

أعلى نسبة مشاهدة،

لحد دلوقتي انا متفرجتش عليه و لكن هو من المسلسلات الي عملت ضجة عالية جدا و سابت اثر عند ناس كتير، هل هو من الواقع؟ اه هو مسلسل من الواقع، هل هي قصة حقيقية؟ مش عارفة، لكنها مشابهة لقصة حقيقية،  مسلسل لمس وتر حساس عند ناس كتير ده لو مكنش عندنا كلنا!

المسلسل بيكلم عن بنت بسيطة من حي فقير بتدخل عالم التيك توك و تصبح مشهورة و لكن زي ما المقولة بتقول ” الشهرة ليها تمن..”

المسلسل هو ضربة قاسية لفكرة و ترند موجود هو اننا كلنا عايزين نكسب فلوس بالساهل من اننا نفضل نصور نفسنا ليل نهار من غير توقف عشان نكسب جمهور و بعدها ترف الفلوس علينا!

هل المشكلة ان السوشيال ميديا هي الغلط، و لا التفكير ده هو الغلط، و لا الناس هي الي غلط!؟ ببساطة كل العوامل غلط، influencers  الي بياثروا بشكل غير مباشر في عملية ان كل بنت و و لد عايزين فلوس بالساهل و شهرة سريعة! كل العوامل أصبحت تؤدي لطريق مهلك…

التكنولوجيا مش غلط و لا اختراع معيب و لكن الاستخدام هو الي غلط، السوشيال ميديا مش غلط و لكن الترند الشهرة المبالغ فيها و التأثير السئ هو الي غلط، زي مثلا العربية، سواق بيسوق بسرعة جدا و خبط حد و موته، هل اختراع العربية هو الي غلط و لا افلام الاكشن و سباقات العربيات و لا السواق هو الغلط! يعني لو بتحب فيلم fast and furious و روحت تقلده و دخلت المستشفى ده مش زنب الفيلم و لا العربية، ده تفكيرك انت!

بالتالي فكرة الشهرة و الفلوس السهلة و و الهدايا الي بتتبعت ل influencers و اللبس و غيرها أصبحت بشكل ما سلاح ذو حدين اما ان حد يقلدهم فيوصل زي المسلسل لسجن و الغرامة المالية او يكون سبب في نجاح شخص و معرفة نفسه أحلامه و يكون بيساعدوا ناس او يدمروا ناس! و يطول الكلام في الحوار ده و احنا هنا بنكلم عن المسلسلات( لو سبتوني اكلم هكتب لصبح…😅)

بلاش تسرع في دخول اشياء مش فاهمنها لمجرد انها ترند او فلوس سهلة، ديما فكروا صح و اسألوا نفسكوا هل هو ده حلمنا و هدفنا و هل هنوصل رسالة و نساعد ناس و لا هنكون سلاح بيضيع ناس و نفسنا كمان!؟؟؟

ع أمل؛

مسلسل لبناني، بيتكلم عن موضوع مهم جدا و هو العنف الاسري و العنف ضد المرأة و الحرية و ان المرأة من حقها اختيار طريقها و تحقيق أحلامها…

ع أمل قصة بنات و ستات كتير في المجتمع الشرقي و العربي، مش بس لبنان او سوريا او مصر ده يمكن كمان في دول تانية اكتر.. و برغم ان المسلسل من حيث القصة حلو و التمثيل و اخيار الممثلين و الأدوار اكثر من رائع،  و خاصة عمار في دور سيف، الراجل الي من كفر، رجل جاهل متعصب و قاتل..  و لا دور ماغي البطلة يسار المذيعة المشهورة الي بتحاول تساعد ستات كتير و لكن بنكتشف انها كانت بنت بريئة قتلها اخوها و لكن الله فوق كل شى و بعتلها الي ينقذوها…

و طبعا لو قعدت اتكلمت عن الأدوار و الأداء التمثيلي اكثر من رائع مش هخلص كلام، و لكن هقف شوية هنا و اتكلم عن طول المسلسل، من رأي المسلسل مكنش المفروض يبقى ٣٠ حلقة و ان الحلقة فيها مشاهد ملهاش لازمة، و فكرتني بالمسلسلات الهندي، بيدخلوا مشاهد بتماطل عشان يطول حلقات المسلسل!

تاني حاجة هي القصة، مع احترامي و حبي لنادين جبر الكاتبة الا ان في مشكلة و ثغرة في منتهى البشاعة في المسلسل و هي ثقة يسار في نيبال، و طبعاها العصبية مع الي بيحبوها بالفعل و شكها فيهم باستمرار!!!!!!!! 

ازاي واحدة نصحت بنتها متحبش اوي و  متثقش اوي و متديش مشاعرها بالكامل لأي حد تقع في غلط زي ده؟ ازاي واحدة شافت الضرب و العنف و القتل من القريب تثق في الغريب الي مبقلوش يومين عارفاه، ازاي نبين اننا نشكك في الي حبناه و استحملها ٢٠ سنة أو اكتر و نروح نثق في شخص معرفتنا بيه متتعداش اليومين!

ازاي واحدة شافت كل القرف في الحياة و لما يحصل معاها مشاكل متتالية تشك في حبها و في كل القربين معادا متشكش في الي اصلا بيعمل كدة؟ و بسبب ده و اسفة لحرق الحدث ان هي ليها يد في ان نيبال يكون سبب في قتل اختها رهف و موت مامتها حزنا على موت رهف….. ايوة انا شايفة ان كبر و عند يسار سبب في قتل اختها رهف و الي احلى شخصية في المسلسل!

مقدرتش بصراحة اهضم فكرة ان واحدة زي يسار تقع بالشكل ده و لكن عشان اكون أمينة في رأى هو ان ممكن وقوع يسار في حد زي نيبال ناتج عن ازمتها النفسية و العصبية و طبعا مش هننسى دور الكبر و العند في الحكاية دي….

يمكن القصة هي واقع نساء كتير في مجتمعنا و لكن ده مش مبرر اني انا افضل أبين ان حتى الي بيفلت منهم بيقع فريسة سهلة لمرضى زي نيبال و غيره، انا معاكوا ان ممكن كلنا حتى الي متعرفش لعنف و قلة ثقة يقع في ايد مرضى نفسيين زي نيبال، و لكن خدوني على قد عقلي للاخر هل واحدة اتربت في بيت حب و ثقة و تجاربها في الحياة  مش قاسية زي واحدة كل تجاربها قاسية و عنيفة، طبعا لا! لان سهل اني أوقع  واحدة اتربت بحرية و حب و ملهاش تجارب قاسية و سهل تثق بسرعة لكن مش المفروض الي عندها تجارب مع العنف و القتل و قلة الثقة تثق بالساهل و لا انا غلطانة؟

هرجع اقول المسلسل يناقش قضية مهمة جدا و لكن التمطيل و شخصية نيبال مش ليقين على القصة و هدفها و كأن شخصية نيبال محطوطة بهدف انها تثير غضبك و تسببلك حالة من الاكتئاب و العصبية و ده في رأى مش كويس و مش هو الهدف السليم و لا بيوصل رسالة اصلا غير اننا نشك في خيالنا 🤷‍♀️

مستنية باقية الحلقات عشان اشوف النهاية و اتمنى النهاية تكون مرضية بشكل ما مش انك بتقولي المقولة المشهورة بتاعت كل الناس ” مش ده الواقع..” انا عارفة الواقع مش محتجاك تعرفهوني، لكن محتاجة انك تساهم في حل أو على أقل تدي أمل،  ع امل بكرة يكون احسن…

إمبراطورية م…

شوية ضحك، شوية بساطة، المسلسل ده ميكس بين البساطة و الضحك و هدف..  ازاي؟ تعالوا احكيلكوا عن إمبراطورية م و الي اصلا قصة الكاتب الكبير إحسان عبد القدوس، و الي اتعملت فيلم سنة ١٩٧٢ بطولة فاتن حمامة و احمد مظهر…

مرة آخرى تتعمل مسلسل بس بشكل مختلف عن الفيلم، و يكون البطل هو الأب مش الأم، و هنا في المسلسل نشوف اثر غياب الأم مش الأب زي الفيلم…

اولا خليني اتكلم عن عدد الحلقات، تاني مش مع انه كان يبقى ٣٠ حلقة و كنت حاسة كان هيبقى افضل لو كانت مثلا ١٥ او ٢٠ بكتير! لكن حصل الي حصل…

نيجي لرسالة المسلسل،  هل المسلسل هنا بيدي رسالة عن اننا منخلفش زي الأرانب عمال على بطال! و لا رسالة المسلسل هو العيلة و العزوة و حب الاهل و التكاتف الاسري، و لا الرسالة ان العمران و التعمير متجيش في الأماكن الي ليها تاريخ و متعمرة اصلا و نروح الصحرا نعمر…

خاد النبوي في الحلقة ال ٢٤ قال كلام حلو اوي و معلش تاني لحرق الأحداث و لكن لازم اقولها، كلنا بنسافر برا و نكلم عن اوروبا و الحضارات و التاريخ و نيجي عند دولتنا الي تاريخها اقدم تاريخ و ميهمناش غير الفلوس فيها فيظهر شخص يبيع و يشتري فينا عشان بس معاه فلوس.. الي بيعمل قيمة للفلوس هو الانسان و لكن أصبحت الفلوس كالشيطان بسبب الإنسان و حبه للمديات، من رأى دي رسالة المسلسل، ان المديات أصبحت اهم من العيلة و الحب و الإنسانية!

و برغم ان دي رسالة هادفة جدا و المسلسل بيناقشها حلو و كمان بتناقش حق الاولاد في اتخاذ قراراتهم و التعلم من غلاطتهم و ان الابوة مش تحكم و خلاص، الابوة معنها سند و ضهر، الابوة مش بالفلوس، الابوة بالتربية و الحب و اه الفلوس مفيدة لكن زي كل حاجة لما تزيد عن حدها تتقلب ضدها…

المسلسل بتناقش رسايل حلوة جدا و أدوار الأطفال و الشباب الجدد هايل الي جانب تمثيل خالد النبوي الجميل و اللطيف.

جودر:

مسلسل من المسلسلات المفضلة عندي دلوقتي، اولا لاني بعشق الف ليلة وليلة و بحب كل الفوازير و المسلسلات الي اتعملت عنها من زمان، و دلوقتي المسلسل ده، و شايفة ان ده نوع من المسلسلات يا ريت نعمل زيه كتير….

احنا بلد فيها أساطير و حكايات و قصص كتير و لكن باستمرار بنكرر نفسنا، يعني مش بنجدد، مش بناخد من حكايتنا و أسطيرنا و قصصنا و نعمل مسلسلات و افلام،  باستمرار و بقالنا عقود بنعمل نفس نوعية المسلسلات و الافلام، لما جه المسلسل ده عجبني جدا،

واحد لأنه قصة من الف ليلة وليلة،  ٢- لأنه التصوير و الإنتاج و الجرافيكس حاجة كدة رائعة، و جميلة و فيها ابداع و يا رب ديما في تحسن عشان نكون احسن من برا احنا مش اقل منهم و نقدر نبدع اكتر من حيث الكتابة و التمثيل و التصوير  و غيره…

ميزة المسلسل انه تصويره ملفت جدا و البراعة و الإبداع في استخدام تقنيات الجرافيكس و VFX ظاهرة جدا و طبعا الأدوار و التمثيل و خاصة دور نور الشرير الي في نفس الوقت فيها نوع من الضحك و دي ميزة من مميزات الف ليلة وليلة  انها قصصها تتسم بالخيال و الخفة…

الحلو كمان انها ١٥ حلقة بس و هي قصة واحدة من قصص الف ليلة وليلة،  لأن كانت حاجة بتدايقني اننا لما نعمل الف ليلة و ليلة مش بنعرف نعمل أجزاء تانية، زي مثلا المسلسل الي كان حسين فاهمي البطل و نجلاء فتحي البطلة،  المسلسل الي متفرجش عليه فايته كتير، لأن المسلسل ده كانت بفكرة مختلفة و لطيفة اوي يمكن شفتوها كتير في الحاجات الأجنبي لكن هي نفس الفكرة في جت سليمة و انه البطلة من العهد بتاعنا الحديث و بتدخل جوا القصص و التاريخ و تسافر بالزمن و المكان للماضي، و زعلت لانه متعملش ليه جزء تاني و نفس الكلام لما تعمل الف ليلة وليلة بطولة نيكول سابا و شريف منير و بردو متعملش جزء تاني…

و زي جت سليمة السنة الي فاتت كانت المفضلة عندي و اتمنى يتعمل منها جزء تاني، او قصة تانية زيها، الا ان بردو جودر قصة حلوة اوي و مسلسل رائع و فكرة اننا نفصص الف ليلة وليلة و نعمل من كل قصة مسلسل ده احسن لو احنا مش بنعرف نعمل اجزاء، فالاحسن نمسك قصة و نعملها مسلسل و بس و اتمنى يتعمل من النوع ده كتير زي الف ليلة وليلة،  جت سليمة و غيرها من القصص الخيالية الممتعة الي فيها هدف و رسالة و نفس الوقت خيال يطير بينا بعيد عن أزمات و مشاكل الواقع المرير….

٢٠٢٤

اولا لازم اقول قد ايه بعشق محمد الأحمد و كمان ثنائيته مع نادين نجيم هايلة و تركيبة حلوة اوي…

مسلسل ٢٠٢٤ هو جزء تاني لمسلسل ٢٠٢٠، و الي اتفرجت عليه في يومين و عجبني قصته بصراحة و الاكشن الي فيه.

المسلسل بدون حرق الاحداث، بيكلم عن تجارة المخدرات و محولات الشرطة انها تقضي على التجار دول من اول الصغير لكبير فيهم و من هنا تبدأ الأحداث تتشابك و تتشابك معاها اقدار ابطلها سما  الي قامت بدورها ندين نجيم و لؤي الي قام بدوره محمد الأحمد…

خليني اتكلم عن براعة التمثيل، محمد تمثيله غني عن التعريف، رهيب، و فكرة انه يمثل اوقات المظلوم و اوقات ظالم و اوقات سايكو في نفس الشخصية،  و قد ايه يبدع في أداء الشخصية المركبة، ده حاجة فوق الوصف،  اما نادين، و الي أبدعت باختلاف ادورها، عجبتني هنا اوي كمان عشان بتبين قوة الست و زكاها.

و لكن برغم ان المسلسل ١٥ حلقة الا انه في شوية مشاهد كانت ممكن متتعملش او تتعمل بس متاخدش طول من الحلقة و وقت زايد، بحيث ان رتم الحلقات يكون اسرع..

و لكن دي وجهات نظر، اكتر حاجة منتظرها في المسلسل هو رؤية سما الجانب الإنساني للؤي و انه مش زي ما هي مفكراه انه وحش و مجنون او بلا عقل مثلا…  مننكرش انه الطابع الاول الي دخل بيه عليها سبب أزمة بس مين يعرف هيحصل ايه و انا بحب الي يعرف يخليني منتظرة الحلقة الي جاية بفارغ الصبر.

و لحد هنا اكون خلصت، لكن دي مش النهاية، لحد المرة الجاية بحبكم، و دايما بخير و سلام و ابتسموا حتى لو صعب لان الابتسام و الأمل هي الحياة و ابدا متتخلوش عن اهدافكوا و احلامكوا… بحبكم XO XO ❤️❤️